مأتم جماعي - محمد عويضه

قل غيرها أسألك بالله ياموت
قل غيرها تكفى ولملم ضياعي

طلال مات ! .. مابقى للشعر صوت
في ذمتي ماعاد للشعر داعي

طلال وإسمه داخل الصدر منحوت
أغفى وأشوفه داخل الصدر واعي

وشلون أداري الحزن والقلب تابوت
يضم جثمانه ويلوي ذراعي

تبكيه صنعاء قبل تبكيه بيروت
من الخليج لطنّجة الكل ناعي

حتى الصغير بعينه الدمع مفلوت
ويرفع يدينه للسماوات داعي :

(( يارب أنا مابي ميرندا وبسكوت
أبي يجي عمو طلال ويراعي

معاي له صورة وهو يلبس الكوت
بروازها من فكرتي وإختراعي))

حتى الطفل في داخلة حزن مكبوت
يعني فراقه صار هم إجتماعي

طلال مات وكلنا للعزا بيوت
صرنا لبونواف مأتم جماعي

© 2024 - موقع الشعر