روح الحياة - محمد عوض سرور

نقش التجاعيد في وجه الحياه الكريه
هيج براكين شعرٍ مابقابه خمود

ونبهت من ثاقب النظره فؤاد النبيه
وبينت دور الشجر والعاصفه والصمود

يأم الأبطال يالعرض العفيف النزيه
يابنتهم يأختهم ياعشقهم فالوجود

يانصف هالمجتمع ياروع من اروع مافيه
لو حاولوا غزوكن بالمغريات اليهود

تبقن روح الحياه ولو يقولون ليه
نقول وش ميز البستان غير الورود

حقوقكن عندنا اكبر من نوايا السفيه
وأسمى من اللي يسميه العدو اللدود

واللي علينا لكن نقر فيه ونعيه
ماينكر حقوقكن غير الردي والجحود

من يحتوينا اكيد إنا نبي نحتويه
يامثبتات الوتد لامن رفعنا العمود

الموت حتى لو إنه ما يجينا نجيه
على غطاريفكن ياموردات الخدود

إليا انتخيتن نبيع العمر مانشتريه
وإليا اعتزينابكن نرد المنايا ورود

وش حرك المعتصم جنده وجيشه عليه
وش قال يوم اعتزى عبدالعزيز السعود

والله من إسمٍ تعززنا بمن يعتزيه
لامنها ثارت الهيجا وقامت تزود

يعني مثل نوره ومريم وجوزا ويليه
بتلا وحسنا وشرعا والمها والعنود

وكم قمتن بدور مهما صار ماننتسيه
يامضمدات الجروح محطمات القيود

ويالضيغميه فعلتي فعل ماله شبيه
قبل امس والشعب الألماني عليها شهود

ضربتي اروع مثل للبار في والديه
وجدتي بكبدك ومن غيرك بكبده يجود

والجادل اللي تبي شوفي وفوزي تبيه
وتتابع بصمت مابين الصخب والركود

ماقول غير ابشري واللي تبينه خذيه
شاعرك ياملهمه ماللطموحه حدود

دام القصيده فرس وإلجامها في يديه
وخيالها الفارس اللي عن حماها يذود

(وتكاتفوا معه عبدإله وربعه بريه
وزكوه علوى هل الردات ذخر الفهود

واصغر سعودي هنا واصغر كويتي هنيه
وله مع جميع القبايل والحمايل عهود)

والله ليوصل هواه وموقفه يحتميه
ووالله ليضرب على الكايد ويرقى سنود

وإنه ليلغي مارادونا ويلغي بيليه
بروح التحدي وبالشهره وحب الصعود

وإن بيض الله وجيه وسودالله وجيه
الله يبيض وجيه معربين الجدود

ناسٍ تخاف الله بحق النسا وتتقيه
وتطبق الشرع فإكرام الودود الولود

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر