حزينه المملكه يا فهد

حزينه المملكه لا.. لا .. حزين الكون قبل العين
دموع اتلبّست زايد صبح فقدك عليها ثياب

فهد يا ابن الملك عبدالعزيز اللي خذاك البين
ولا خلى قبل موتك رجال وأنبيا واصحاب

كسرنا الموت قلنا له : إذا ماجيتنا ميتين
واذا مرّيت أرض اتطيح هامات ودُوَل وارقاب

فهد كن السما كلها عيون ٍ والبحر بحرين
وناداها العطش وتفجرت تحت الحجاج تراب

بكاك البيت والمسعى ومن طافوا هنا ملبّين
وزمزم والحجر الاسود ومكه وركنها المنصاب

ويثرب والحرم فيها يصلّي والبقيع الحين
تعزّي كل خفاق ٍ على خطوة رحيلك ذاب

فهد قالوا أديم الأرض من أجساد هالميتين
وكل حيٍّ على الدنيا حجز كرت ووقف ع الباب

أمانينا بهالدنيا غصون اتمرّغت بالطين
تصير ايامنا الفاس ومنيّتنا لها الحطاب

ولو ان الحياه تفنى بموت اللي سبق .. فانين
ولكن حكمة الواحد يسلّم بعضنا الجلباب

فهد .. ما مات من خلّف رجال ٍ ع العهد ماشين
رحلت وصار عبدالله يكمّل سيرة الاحباب

حزينه المملكه لكن عزانا انك خدمت الدين
مثل زايد ابن سلطان تبقى للنظر أهداب

حزينه المملكه لكن عزانا انك بوسط العين
مثل ما اتلبّست زايد صبح فقدك عليها ثياب