عزاه يا قلب

اللي هتف باسماه قلبي وناداه
حتى الضلوع بوجدها صفقت له

اللي غرامه تل قلبي من اقصاه
وبالدمع عيني خيلت وامطرت له

اللي عسفت النفس لاجله ولرضاه
والرجل في سمر الغداري عنت له

بيا سبب عهد الهوا ليه ينساه
وينسى تخطي رجلي اللي خطت له

الرجل لو هو نازح الدار تنصاه
على حثاث القاع ياما مشت له

اموت من فرقاه واحيا بذكراه
والروح خلت جسمها وانتحت له

قولو له انه عذب القلب وادماه
وحي يود لقاه ماله بقتله

يا كود والله غيبة عقب لا ماه
وعيني بكت فرقاه ثم اخلجت له

ما صاب قيس بحب ليلى ثوطاه
ولوعات قيس وما جرى له جرت له

ما لاق له غيره من الناس مشهاه
ويعاف كل الخود لو عرضت له

ان شاف زوله غرم القلب يبراه
وان مر غيره صد ما يلتفت له

اغليه لا منساه واذكر سجاياه
لو هو بعيد الدار نفسي هفت له

معذبي بالحب وان حل طرياه
اسرار ودي بالضمير اهتفت له

لو هو ظهر للناس وابدى محياه
كل الخلايق بالجمال اشهدت له

عزاه يا قلب على الصبر مقواه
لو ما بغى الفرقا عصت واخطمت له

عزى لمن دمعه على الخد مجراه
ودياه غيب نورها ما اسفرت له

قولو لبن سلوم ابو زيد ينخاه
يوم ان غارت الهوا صادفت له

يتابع الونات من كود ماجاه
لو كثر الونات ما فرجت له

يهيم مثل موده وسط مضماه
يذكر سنين بالوداد ضحكت له

ماجت له الدنيا على ما تمناه
وذياب ياسه من حبيبه عوت له

يكفيه من جور الهوا ربع ما جاه
وتغيرت دنياه يوم اوجهت له

قلبه من الحرمان فاخت حناياه
من يوم باقي ايامها ما صفت له

هنيت من حصل مرامه بدنياه
والورق بلحون السعد غردت له

المولع اللي في طريق الهوا تاه
لو ما بغاه اشراك دربه سعت له