ان كبرت القاله - محمد احمد السديري

ان جا ينادمني وضيع من الناس
صديت عنه وقلت منتب نديمي

ما هوب كبر وكل ناس لها اجناس
وعندي عزيز النفس دايم حشيمي

للكبر والله ما توشحت بلباس
بكتب التواضع ناجح بتعليمي

انادم اللي رفقته ترفع الراس
وياقف معي دايم بوجه الخصيمي

ان كبرت القاله والارياق يباس
يظيم عدوانه ولا يستظيمي

وعندي لاشفت المناعير جلاس
انا لهم بايات فكري كليمي

ولا قارب الخايب ولا كل بلاس
اللي على نقل النمايم فهيمي

نشدتني تقول بالقلب هوجاس
قلت أي نعم مافيه حي سليمي

يا بومحمد كن ماعندي اوناس
اليا خفق فكري بشي عظيمي

واللي نوده قطعت عنه الارماس
ذكراه مثل احلام ليل بهيمي

وقت النضا قفا وقفن الافراس
وحتى زهور الورد صارت هشيمي

والنمر مخلد عقب ما هوب فرّاس
والبوم عقب الذ ل صبّح عديمي

وديك الدجاج معلق فيه الاجراس
والصقر في صكات وقته سقيمي

وابو حقب حصّل بالايام نوماس
الحر غاب وصار عقبه زعيمي

وين الرجال مروية كل عباس
اهل المهار اللي تعط الرهيمي

اقفوا كما غيم تقفاه نسناس
ولاحدن بها الدنيا مقيم مديمي

كم واحد في لجة العيب غطاسيفوت عمرة في ضلاله بهيمي
من الذهب لوهوخزن طرم الاكياس

جن من كريم وحرم منها اليتيمي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر