ياراكبين الجمس - مجول عبدالهادي بن ريضة العجمي

يا ربعنا زانت حلول المظاهير
والعشب قالوا فيه تشبع رعاياه

يا زين شوفه صاير له نواوير
في خايع بعد المطر ماحداً جاه

يا زين به دراج خلف مصاغير
وسيله جديداً تو منه نشف ماه

يا ربعنا لا تكثرون الأشاوير
واللي بيعذلنا فلا حن بوياه

شيلوا على جمس ضري بالمشاوير
لفالح بن مشعل عسى النذل يفداه

ويا راكبين الجمس حثوا به السير
وعند آل جار الله مقره وملفاه

نبغي نسير صوب ربعا مناعير
صوب الذي كلن جنابه تمناه

ابو خميس ما يهاب المخاسير
فالح عسانا دايم الدوم نلقاه

ابشروا الى جيتوا بحشمة وتقدير
عند الذي الطيب سهمه ومجناه

يفرح الى جاوه ربوع مسايير
جيانة الضيفان من غاية مناه

فالح وناصر مكرمين الخطاطير
لكل منهم تفعل الطيب يمناه

لكل مهم وافيي بالتشابير
ولكل منهم طيب الرأي مبداه

ما يشين وجهه في الليالي المعاسير
حاذور يا فالح تزل وتعداه

والنعم باللي ما يجئ منه تقصير
ويفرح به اللي من بعيد تنصاه

ومن لابه تحمى صخاف المعاشير
لا جاء نهار به كثير المثاراه

ونبغي لنا وقتاً بليا محادير
بنسج مع فالح ومثله وشرواه

© 2024 - موقع الشعر