سفانه

متكبّره ليش ؟ امانه ليش قولي لي
الكبر لله عظيم الشان سبحانه

عجزت اجاريك وانتي ماعرفتي لي
لاوالله إلا نويت البعد يا فلانه

ياطول صبري عليك وياغرابيلي
النفس من ماتشوفه منْك مرضانه

والصبر من كثر صبري قام يشكي لي
قامت تهاوى لك الله كل بيبانه

لا بارك الله بيوم ٍ به عرضتي لي
ماكنت أظنّك إلى هالحد بطرانه

أعماك كثر الغرور ولا حسبتي لي
قلتي أباجيب راسه وأعقد لسانه

مانيب انا اللي أضيّعها مداخيلي
أدش وأطلع وراسي عالي ٍ شانه

أنا عرفتك بتفكيري وتحليلي
مغرورة ٍ حيل بنت فلوس فسقانه

أمّا من انتي أبد ماكان يعني لي
يومي عشقتك / عشقتك كونك إنسانه

مانيب قايل على فرقاك يا ويلي
مثلك أبد مايهز القلب فقدانه

ولاني بجر النوايح في مواويلي
لاطالت السالفه ويّاك خربانه

روحي وانا اروح لاني لك ولا أنتي لي
لابوك (حاتم) ولاانتي مثل (سفّانه).