المتهم والخصم والقاضي - مبارك الخليفه

لا والله الا قضا صبري على الفاضي
ومليت وانا ارسم الصوره واعدلها

واتعبني الحاضر اللي كنّه الماضي
وتالي رسوم المحبه تشبه اولها

يا سبة امراضي وسبة شفا امراضي
ياعالج الروح والا لا تطولها

الصبر ما عاد له لازم ولا حاضي
ورسالتك واصلتني قبل ترسلها

لا تحسب اني على طول المدى راضي
صابر ومقهور في القصه بكاملها

نور الوعايد على مر الزمن ياضي
وتطفي شموع الملاقى قبل لا اشعلها

وتشفي بقلب الجويع بجمرك اللاضي
وتشوي له اللقمه ويصبر .. وتاكلها !!؟

الصبر زلزالي اللي شتت انقاضي
ونهايةٍ للبدايه قبل لا اصلها

تخيّل الصبر لو يقضي وهو قاضي؟؟
واطباعك وجملة احكامك .. تخيّلها

ما دامك المتهم والخصم والقاضي
اخذ القضيه على كيفك ,, وحللها

© 2023 - موقع الشعر