موعد العشاق

يا موعد العشاق ما فات الحظور
عرفت لحظاتك وجيت بحينها

حتى دفعني صداق احساس الشعور
والذهبه ضاعت ولا ادري وينها؟؟

لقيتها !! لا شك به بعض الامور
تخرب الفرحه على راجينها

لقيتها والزين يزداد ويفور
وتوزعه بيسارها ويمينها

ولقيت لي طابور يلتف ويدور
وحجيت لي حجه ولا اعرف دينها ؟!!

مسكت دور .. وطافني عشرين دور
كله على شان أتمقل زينها

ومرت وهي تمشي وفي الممشى غرور
وشحّت علي حتى بنظرة عينها

وما سمعتني حرف ؟ لو بين السطور
ولا اشرت لو بالغلط بايدينها؟

الله يسامحها على هذا الفتور
اما عباراة الغضب يا شينها

تخطي واسمحها ولو بان القصور
ويبقى الغلا من بيني ومن بينها

وان جاتني بفرش لها الدنيا زهور
ونسكن بيوتٍ للغلا بانينها

وان دبرت فالعمر كله في دبور
لو طالت الدعوى على تانينها

اخطيت في الالحان من حب الظهور
واصعب مراحل الاغنيه تلحينها

وان جيت اطوفها فلاني بمعذور
رسالةٍ كتابها قارينها

وتبيّن اللي كاتمينه في الصدور
يازينها في وقتها يا زينها

احبها من قلب واحساس وشعور
لاشك نفسي ما استطيع اهينها