من عزتي - ماجد خالد العضياني

من عزتي مرضى على النفس تنهان
ولا عاش مخلوق(ن) تجاهل وجودي

العز طبعي من على ماض الازمان
مخضع ياكود لربنا في سجودي

الرجل عقل وقلب واحساس ولسان
وبعض العرب عرفه عسى مايعودي

ولا جامل الغلطان لا صار غلطان
اعلمه حتى يعرف الحدودي

وقايس الرميه على عيار نيشان
ماتنقص الرميه ولا هي تزودي

وانطق بقول الحق وبليس شيطان
مانيب للحق المسمى جحودي

والمسلم اللي ماتحلا بالايمان
احسن نعده من حساب اليهودي

والناس تال ايامنا طبعها شان
ماعم كل الخلق عد معدودي

بعض العرب قلبه من الحقد مليان
يالله لاطّول حياة الحسودي

وبعض العرب خاين وللعهد خوان
مايلتزم بالعهد ناقض عهودي

وبعض العرب مستور والبعض عريان
وبعض العرب والله تغث الكبودي

وبعض العرب يركض على الشر عوان
احسب حسابه فالليال مهجودي

وبعض العرب عده من زحول فرسان
بالهرج وان جاء فعله اسبق شرودي

وبعض العرب من كلمة النعم خسران
مافاد نفسه مال احد منه فودي

وفالناس خسران (ن) وفالناس كسبان
والطيب اللي عن حياضه يذودي

هذاك رمز الاسم والاسم عنوان
حطه على يمناك ضمن العضودي

راع الكرم والجود هو طير حوران
اللي على الجزله قديح الزنودي

والشعر سبك وحبك والمام ووزان
ومصنف(ن) للناس حسب البنودي

شعر(ن) على معنى وحجه وبرهان
وكل(ن) على ماقيل حسب الجهودي

وشعر(ن)على نسج الخيال وبناء شان
تصنيف شاعر كل حبل معقودي

ومن هيض ولا غيض والعلم وكدان
وتلقى على ماقول ناس(ن)شهودي

وبعض الشعر ماله مع الناس ميزان
لاقال شعره قالوا انه يدودي

هذا كلام اللي يقوله بوكدان
مافي عرين الفهد غير الفهودي

© 2024 - موقع الشعر