الحــــــان الفــــرح - كديميس السيحاني

يا حمام الورق ليه تنوح بألحانٍ حزينه
وانت عندك علم عما لك بصدري من ميانه

غن بألحان الفرح واقطف ورود الياسمينه
جرّد الأغصان من خضر الورق وابقى مكانه

لو تقول إن العلاقة بالورق صارت متينه
قلت لك من جرّد أوراق الشجر للخيزرانه

لا تقول إن الغلا في القلب و اقول ءلك وينه
يوم يرسل لي سهوم العين ويعيد اسطوانه

لو هوى بالي سألني عن مبادينا الثمينة
الجواب الأصمعي للناطق حصانه لسانه

خذ من الشايب بيوتٍ كلها سبك ءورزينه
ما تباع وتنشرى في سوق غسان و رهانه

صاحبي قل لي وش اللي كسر قفول الخزينه
اثرها خزنه تجارية وانا احسبها تكانه

لا تعرض للمقفي عنك في قسيه ولينه
و اخذ عبره كان باقي عندك احساس وذهانه

و خطة الأحزاب تفشل ما تقاد ءبها سفينه
دام قبطان السفينه عارفٌ سر البطانه

ما اعلن الإفلاس بنك انقلترا و محافظينه
يوم سوق البورصة ينهار مافاده ضمانه

الخسارة في الرباء لو راس ماله ضامنينه
بس في حكم المصارف سجّلوا نقطه وزانه

و الجنيه بسلة العملات ثقله حافظينه
ما يؤثر فيه سوق الأسهم بعقل الرزانة

و لو تصفحت الروايات القديمة للمدينة
حرب داحس حامية وسلاحهم غِيرة فلانه

مير عنتر ما يفر من العداء والله يعينه
يوم يضرب ضربته لعداه ما خانه حصانه

و اشهد ان التجربة للرجل تبعث له سكينه
رابح اللي يستفيد من التجارب في زمانه

و اشهد ان المعرفة مع بعض خلق الله غبينة
الردي لو هو موالي مايجوز عن اللعانه

و اشهد إن العقل للرجال يا الأصحاب زينه
ما ندم من هو تزيّن به, وشاف أهل الخيانه

الحقايق تنجلي له و الأسد ثابت عرينه
و الثعالب رزّت الأذناب و تهاب الحََصََانه

وكل مخلوقٌ يوالف شبهه ويفهم رطينه
ومن تمادى في الخطأ لا بد يلقى اقسى الإهانه

© 2024 - موقع الشعر