على شان الموده لو مشى درب الوعر ما احفاه - كديميس السيحاني

حروفي واكبي هاجوس فكري واقتدي مسراه
سرى في عالمه توضي حروف الشعر شمعاته

تبسم له وتبكي له وتضحك من سبب بلواه
تقول الصبر مفتاح الفرج هات القلم هاته

اسولف للحروف وتنكتب والفكر له مرساه
ليا ابتل الورق يوم اليراع تهل دمعاته

لياارتعشت يدي تسترسل افكاري على نجواه
مدااار الفكر من غيضه تسابق منه ساعاته

شرح قصة مسيره والقوافي حرفها ينخاه
يقول اكمل فراغ الصمت فرحاته ولوعاته

تصفحت الكتاب وشدني بالحيل يوم اقراه
قريته ب التمعّن يوم أقَلب منه صفحاته

شربت من البحر ملحِ اجاج وخاطري ما ارواه
وشربت العذب من نبع الصفاة وزاد جرعاته

وتسمعت الرواة وعشت واقع وين انا وياه؟
صحيح انه رحل ماضي مثبّت منه بصماته

تحوّل ملح اجاج البحر عندي سايغ ابسقياه
ولو منه ارتفع ضغط الخفوق لحد روعاته

تعب تجوال تفكير المولع والسبب ليلاه
يناديها ويرجيها ولع ما تسمع اصواته

على شان الموده لو مشى درب الوعر ما احفاه
سكن عشق الهنوف بخافقه يا بعد هقواته

يلاعبها طرب والحضن عن برد الشمال ادفاه
يراقبها ولا يرضى عليها منه هفواته

يعانق طيفها ويبوح له بالسر ما خفّاه
شكى منه وشكى له من هواه ويجمع اشتاته

وضعها تاج ويماري بها حتى يغيض اعداه
عشيقة سرّه الخافي بصولاته وجولاته

وأنا لو قلت ياهاجوس فكري للهدف مرماه
يجاوبني مساري صح ليه اكبح طموحاته؟

© 2024 - موقع الشعر