لا ترخص الدمع

لا ترخص الدمع يالمجمول وتهله
الدمع غالي وما يبكيك يبكيني

صارت رموشك من العبرات مبتله
يا زين شكل الهدب لا هلت العيني

أخاف تضحك علي إن قلت لك والله
إن نظرةٍ منك تنعشني وتحييني

يفداك قلبٍ غلاك اليوم محتله
ما هوب قلبٍ على ذات اتجاهيني

من بدة الناس معطيك الغلا كله
وانا على العهد ما دامك مصافيني

ياسعد من صرت يالغالي حلالٍ له
يعيش طول العمر من زين في زيني

الدرب مشروح قدامي و انا ادله
لكن هرج العرب ما هو مخليني

اقول متعافيٍ ما صابني خله
الى نشدني قريب الناس وش فيني

ماغير اجامل معه وادرا من الزله
واخفي عذابي عسى ربي يعافيني

ماعذب القلب وجدد خافي العله
إلا عبارة..( طلبتك لا تخليني )