أنا زبنتك

يامن جحدت إسمك علي و يش دعواك
منعتني لاقول عاشت الاسامي

دامك معي برضاك والله منساك
واقدر تقدير فوق إحترامي

يازين فعل الخير سوّه بدنياك
ارفق علي شوي و افهم كلامي

أنا زبنتك و إستلذيت بحماك
قتيل عينك لو شكا ما يلامي

شافتك عيني و اعجبتها حلاياك
وأصبح غرامك لاجيٍ في عظامي

اسلي النفس الحزينة بطرياك
واداعبه في سجتي و انسجامي

لا تقول محدٍ شاف طلة محيّاك
مهما حجبته ما غشاه اللثامي

شبهت عيني بعين غالي دناياك
قريبك اللي له بقلبك مقامي

و إستوطنك الإعجاب فيني سبب ذاك
و ارتحت لي يازين غض القوامي

حطيت قلبي من لواحظك مرماك
و الرمش كنه السيف في كف يامي

شجاع و صيته عند ذولا وذولاك
ياويل من عاداه يوم الزحامي

و الزين كنه حالفٍ ما يتعداك
خلاك يالمجمول غاية مرامي

ألهفت كبدي يوم تبخل على ماك
لهف القطيع الواردات الضوامي

وان قلت لك لبيه لا تقول وش جاك
خلني على ذالدرب لو كنت عامي

و آخر كلامي يا منى الروح نفداك
منساك و حبك داخل القلب سامي