حايل

لـ فيصل بن طواله، ، في غير مُحدد

حايل - فيصل بن طواله

قلت :حايل وحن القلب لعيون حايل
وأرزمت في شمال ضلوع صدري خلوج

من طت لي نسيت إن الزمان متمايل
قمت أدوج بغلا منهي بروحي تدوج

ديرة الهيل وأرض مرودمات المخايل
ديرة العود الأزرق والصباح البلوج

منقع الجود00مشراف السعد والنفايل
عندل المجد واحجاج السحاب الهدوج

ياسنام اللذي زم الحمول الثقايل
ياوساع اللذي ضاق بوساع الفجوج

جيتلك في ليالٍ فيهن الوقت عايل
جيتلك في زمانٍ فيه الأيام عوج

جيتلك (يابعد حي) اللذي جاك شايل
طفلٍ إحتاج حضن أُمه وجاها دروج

كل ماأدلج نهيد الشوق بين النحايل
تلني لك من المعلوق فكرٍ سجوج

إيه أحبك كثر(ماباالطنايا) صمايل
وكثر ماسيف عنتر لأجل عبا هروج

وكثر ماأشبع (صخا حاتم) بطون الجمايل
وكثر ماعطف (شمّر) كف دمعٍ يروج

مانزل قدرك اللي معتلي كل طايل
وإن فرضنا نزل فوق السما له بروج

يوم (سلمى ل اجا) تقضّ شقر الجدايل
والنجوم بنحرك قلادةٍ ياالغنوج

بين شح القصيد وبين جود الخصايل
جيتلك والمعاني وسط قلبي تلوج

جيت00ماجيت أبمدح بك عيال الحمايل
الرجل لامدح نفسه يصير امحجوج

هم هلي00عزوتي00وإن عوّدت للفعايل
يقصر الشعر عنهم مالحقتهم اهروج

ومن بغى ياصفك ياعيطموس المثايل
وش الأطرم يقول: إن شاف طرفٍ دعوج00؟؟

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر