شعور

أسولف على نفسي وأحسبك...تسولف لي
أحسبك معي جالس وأنا جالس لحالي

أبنشدك يا الغالي ولا ابيك...تحلف لي
هو إنت إنت يا الغالي مثل ما انت...يا الغالي؟

تكلم قبل صمتي من الحزن يعزف لي
جروح بصدري مالها أول ولا تالي"

وقبل ما آصف شعوري أبي منك تاصف لي
شعورك بدوني مامعك غير ترحالي

تأسف..؟على وشهو حبيبي تأسف لي؟!
أنا"المر" لو هو مر...منك أشربه حالي

أنا من كثر ما أجهلك صرت...تعرف لي
وأنا من كثر ما أعرفك صرت...اجهل احوالي!

إذا جيت أبي أنساك...ذكراك تاقف لي
عيوني إذا ماشافتك..جيت في بالي

خيالك معي من وين ما اروح...يصدف لي
وأنا كيف أصد أو إني...أهرب عن ضلالي؟!

زرعتك بوسط القلب من شان تقطف لي
زهر عمري اللي راح مني على خالي

على كثر ما الاحباب...بالحب تهتف لي
يصير الحبايب لا هتفت إنت..عذالي!

كفايه إليا من جيت مقبل تعطف لي
من إقبالتك أنسى همومي وغربالي

وكفايه...إليا من قمت بالحب تهتف لي
كأني بهاك الساعه محقق آمالي

كأن الغرام اللي إنولد بيننا..طفلي
أداري غرامك مثل ما اداري...عيالي

دخيل البروق اللي بخدك..تكاشف لي
ترفق بحالي...طالبك يابعد حالي

ترا في يدك مفتاحي...وفي يدك قفلي
وترا مالقفلي غير مفتاحي...الوالي!!

وإذا أخطيت يا الغالي علي لا تأسف لي
لأن الخطا منك إنت غالي ومن غالي"!!