صوتك عذر

صوتك عذر لا تشغلك كثر الاعذار
خطاك أعرفه زين لكن نسيته

قدام صوتك تنكشف كل الاسرار
صوتك شفعلك كل شي جنيته

مافيه داعي كل ما اخطيت تحتار
سولف وتاخذ كل شي بغيته

شفت الزعل وش كان واليوم وش صار
شفت ان عذرك لابغيته لقيته

شفت ان صوتك لا تكلمت جبار
لا من طلبت الحب كله عطيته

ياصوت اغلى ماحصلي من اقدار
يادرب انسى الهم لا من مشيته

مادام لك في القلب قيمه ومقدار
يكفيك حب في عيوني قريته

وشفيك اجل تتعب على جمع الاعذار
مادام جرحك في خفوقي نسيته