الضرير

ماسمعتوا عن ضريرٍ عينه تشوف وضرير؟
قلبه اعمى مايشوف ..وغدره اصبح صنعته

ذاك من شره تجاهل طيبته..والطيب خير
ما بعد مره سمعت الناس تذكر طيبته

ما سلم منه غني .. وما سلم منه فقير
الحسد والشر دايم داخله من خلقته

ما تقدم في مسيره ..ماله اصلاً في المسير
غافيٍ والناس قامت .. ما صحى من غفوته

ان كذب كنه يسولف وان حكى حكيه كثير
والكلام ان ما توازن .. كثرته هي قلته

قشتًه لو كان صادق قاصمه ظهر البعير
وش علي من البعير .. وًش علي من قشتًه

شتته شيطان فكره.. حسسه انه كبير
مادرى اني كشفته.. قبل يبدا لعبته

يلعب احسن له بعيد ولا يصير اللي يصير
لا يظن انه فطين .. وتمشي عندي زلته

الارانب دوم تمشي و الصقور اللي تطير
واللي مثله .. لا يطير ولا يصحح مشيته

لو عسف خيل المراجل .. يبقى في عيني صغير
اعرفه.. واعرف طريقه مايخلًي سكته

اقدر اسوي سواته .. بس انا عندي ضمير
بس لو شفته تمادى.. لازم اكسر شوكته

كان عقله ما يفرًق بين (رجاًل)و(غرير)
عقلي اكبر من كلامه .. كل شخص وفطنته

الصديق يفوح مسكه..والعدو نفًاخ كير
واللي ما يعرف مقامي ما علي من قيمته

اقدر آميًز عدوي من صديقي فالأخير
فرق بين اللي ضحكلي..واللي يصنع ضحكته