قلبين وسما

المحبه حديث الناس والساعه
سالفتها تطول ودربها سيره

من زمان وثراها تبكي أوجاعه
وما امطر الشوق غير الخوف والحيره

كل ما نسنس الطاري بذعذاعه
هزّت الريح قلبين وسما ديره

ياهو الحب شيّ بغربة أطباعه
بين حلو الخيال ومرّ تفسيره

ياهو الحب ذل ونفس مرتاعه
راحته دمعتين ونظره وغيره

حب عن حب يفرق والهوى ساعه
صاغها العاشق بحرفه وتصويره

فيه حبٍ وراه أهداف طماعه
وفيه حبٍ يعزه بس تقديره

فيه حبٍ حدوده همس سمّاعه
وفي حبٍ مقاديره .. مقاديره

فيه ياما وياما ناس ملتاعه
الله اللي حرمهم ماحدٍ غيره

وفيه ناسٍ تحط الحظ شماعه
واتعذّر بقولة (( علّها خيره ))

ياهو الحكي يجرح درب مرجاعه
كبر ذنبه يغص بحلق تكفيره

ياهو الصمت يظلم لهفة أتباعه
ضيّع اللي يخون وبان تقصيره

والمحبه حديث الذل والطاعه
دمعها تاج خدين لدواويره

الله أكبر عليها صارت طماعه
رغم نار الأسى والشوق والحيره

تمت الإضافة بواسطة:سالم ال فروان