ريّح اصبعْك

بغيب عن عينك و ليلك و مسمعْك
و ارجوك غيّبني عن اعماق بالك

انا علي أبعد و أخليك و اقطعْك
وانته عليك تشيلني من خيالك

اذا عنادك ما قوى عني يمنعْك
عليك ما يغلى عنادي .. حلالك

و اذا دفع شوقك لجوالك اصبعْك
اقفل مفاتيحه و خل اتصالك

حاولت انا يا باشة الغيد ادلعْك
و اتحمل اسلوب الجفا من دلالك

لكن برودك كل ما جيت اولعْك
خلاني افقد راحتي في وصالك

ما كان ودي بعد لقياك اودعْك
تعبان قلبي من كثر ما مشى لك

شاعر اهيم بوادي الغي..و اتبعْك
و اللي بقلبي لك يفوق احتمالك

قلب ٍ على عرش الغلا يوم ربّعْك
واجب تروف بحاله ليا شكى لك

رواك من شوقه و من الوصل شبعْك
و خلاك تفعل بالهوى ما بدا لك

ان طحت من عينه ترى القلب يرفعْك
و ان عذربوبك ناس .. يمدح خصالك

لا تحرمه فرصة عمر لجل يقنعْك
انه رمى هالناس خلفه و شالك !

متحطم ٍ خلا حطامه .. و جمّعْك
عزيز لكن من غلاك .. انحنى لك

يضر نفسه بالسهر لجل ينفعْك
ما فكر بحاله .. و فكر بحالك

ان كان لك غيره غلا .. ربي يجمعْك
باللي تحبه يا عسى السعد فالك

و ان كان بك شوق ٍ لطاريه يدفعْك
بس اهمس باسمه و تلقاه جا لك

يا شعري الكاذب عسى الله يقطعْك
اكْذب بك و قلبي من الشوق هالك

لا تستمع له صاحبي .. و ريح اصبعْك
انا اتصل بك .. و انت خل اتصالك !