بالغلط ضميته

من بنات الفكر ثارت واستباحت فيني
صوت همس في ضميري خافي كنيته

ساهر والليل سامر والعرب ممسيني
وان غفا جمر المشاعر بالأمل صحيته

نايف في طعس نايف والطروق تزيني
لا رقصت للريح ضوي هاجسي غنيته

ياحروف الشعر قولي ثصتي وأحكيني
دام نزف الشوق غصب بالورق بكيته

أصهلت خيل المشاعر صوتها ناصيني
وأنتخى فارس قصيدي والقلم سليته

أرسم الدمعات ضحكه في شفاه سنيني
كود يسعدني زماني لاضحك وأرضيته

أرحلي ياهموم هيا مامضى يكفيني
طفلي الغايب لفاني والحزن سريته

له رقيق الشعر غنى بالقسى والليني
ياقسى لينه على كثر أزعله حبيته

أوصفه لا تنشدوني وش بقى من زيني
كل زين تذكرونه إصدقه من بيته

له مع السلهام نظره تذبح الحييني
وله تغناج يصحي كل نفس ميته

أختلف نبضي بدمي والسبايب عيني
إن سكت خفت أتكلم وإن حكى لبيته

أرعشت للبرد كفي والعرق كاسيني
الشتا والصيف فيني والنظر مليته

أنتثر فنجال شوقي من كفوف ايديني
وجيت أصافحه بيميني بالغلط ضميته