ردعان في المجلس صناديد وفهود
والروح في وجه العدو يرخصونه
اخوان سوده يوم طارد ومطرود
يوم القبايل رزقهم ينهبونه
يوم السرب مابين حاوي ومردود
والمال في ظلم الجهل يسلبونه
الى عثة شهب الرمك غالي الذود
صبحا عليهم شيب الراس كونه
وتبارزوا مابين ظاهد ومظهود
وكل قلب وجهه على غير لونه
ودخن عسام الجو عجن وبارود
والنذل جبن والبطل ينتخونه
وحول ثقيل الرجل في تالي القود
المعترض في ارض الوغى يتبعونه
والظفر ابو غلاب يضرب على الكود
سبع الغدارى يقصر العلم دونه
تفكها الردعان من كل ممرود
كم فارس من دونها يطرحونه
يوم الرخوم وقوف ووجوههم سود
اخوين والبوش العفر يحتمونه
حرام مايوخذ من البوش مفرود
والى اوخذ من جارهم يلحقونه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.