الا يــا ويــل قـلـبٍ - فتاة العرب

الا يا ويل قلبٍ بات ليله
سهيرٍ ما لجى منهم مثابه

خذوني وانهبوا قلبي دغيله
حرام وغلّقوا للوصل بابه

الا يا من يثيب او بشتكيله
ويسرع لي جداهم بالإجابه

حبيبي كان شكوايه عضيله
ترى غيرك صوابي ما درابه

ابات الليل في حامي مليله
وجسمي عاد ما ينقل ثيابه

ولي نفسٍ من الفرقا عليله
تضاعف عزمها عقب المهابه

اذا جا اللّيل ضوّالي ضويله
وفكري ينخرط عندي حسابه

عسى من سبّب الفرقا الطّويله
يحلّ الحين وانواع البلابه

يحنّ الخلّ لي فارق خليله
ولا ينلام من حلّ الشّقابه

ذريف الدّمع من عيني هميله
سقا الوديان واخضرّت عشابه

على سيدٍ تملّكني بحيله
وذاب الحيل من طول الوزابه

رماني جور وادعاني جتيله
وسهمه في الحشا مكّن صوابه

تجبّرني وحيلاتي جليله
وحيلي دونهم عيّت رجابه

حبيبي فيه ما اعتاض البديله
ولو عن ناظري طال المدابه

ولو هو: م البقايا ما ارتضيله
فلاكنّه شريفٍ في جنابه

كحيل العين مسمّر اليديله
دجور الكيف في غاية شبابه

عيانٍ دعج واهدابٍ ظليله
وخدٍّ مثل بدرٍ ينسرابه

وخصرٍ يشتكي من الرّدف ميله
تزخرف بالنّعامه واللّبابه

انا يا سيد نفسي لك دخيله
ترى حالي سعير الهجر ذابه

تراني منك حالاتي عطيله
عساك تثيب قلبي من عذابه

بوصلٍ يشفي الرّوح العليله
تمن وخاطري تكسب ثوابه

أنا ما حمل من هيرك مجيله
وهذا علام رابع في حسابه

وختمي عدّ برّاق المخيله
صلاتي للنّبي ثم الصّحابه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر