لولا الأمل - فالح بن عاتق الحارثي

تعالي وش بقى فالعمر حتى نضيعه بفراق
تعالى نرتفع فوق الخصام ونطوي همومه

أنا في قربك أيامي يلاقيها الفرح بعناق
وأنا في غيبتك موتي احس أنه دنا يومه

أنا وشلون أبدد في غيابك حيرة الأشواق
أنا وشلون أهدي القلب لأمنه عصف لومه

مدامك لو ظلمتيني أحس البعد ما ينطاق
وكل احساس فيني يصيح مهما تقول مظلومه

تعالى بالربيع اللي بحلوله تخضر الأوراق
ولكني عشقت أطباع عند الغير معدومه

عشقت عيون ضمت حبها يوم الومن به ضاق
وهمت بروح تبخل بالعطا لو ضاع مفهومه

وعالم فيه أحس أني طويت بكفي الآفاق
ولو فيه الصبايا نجوم كنتي أرفع نجومه

تعالى بالنعيم اللي يخفف لوعة المشتاق
صحاري خافقي ترجى حنانك تمطر غيومه

نلوم الوقت وعمر الوقت ما خيب رجا العشاق
ولكن نصنع الحرمان ونهجي الوقت ونلومه

حرام نضيع ايام المحبة في عتب وفراق
ونرجع بالندم يمحي خطايا قلوب محرومه

كشفت أوراق وباقي شي عيت تكشفه الأوراق
لأن الحب ما توفيه صرخة حرف مكتومه

© 2024 - موقع الشعر