يا راكب اللي يوم يقفي مع البيد

يا راكب اللي يوم يقفي مع البيد
كنه طخاف ٍ مقتفيه البرادي

يزمي على البيدا مثل شامخ الحيد
عجه خلافه والطريق متقادي

وان قلت كنه من يبي فكة القيد
قلت اشقر ٍ فيه المواري تنادي

حر ٍ مواري ندرته بالتفانيد
متفهق الجنحان جبر الثنادي

مافيه ماتخفيه والا مناقيد
غير العناد وغير تل القيادي

عليه نقش الريش مثل المباريد
والا لدقات المجالد يشادي

تشد المواسي فيه وصف المجاريد
والكف راهي والصوايد حدادي

والعاتق ارهى فوق بيض ٍ مسانيد
طوله على دق الشقار متمادي

والعين فيها من حدمها تواقيد
نار ٍ يشطرها الهوى فالسوادي

لا فرعه راعيه في حروة الصيد
يبري جروحه في ليال الهدادي

هذا وخل الجيب يعط التخاديد
نصه مواكير الفخر والعنادي

نصه لدار الشامخين الأماجيد
دار الشيوخ مسنعة كل غادي

دار الشيوخ اهل الثنا والتماجيد
آل الثنين مطوعين المعادي

اللي لهم فالطيب سلم وتقاليد
ماحدهم عن نوف الأمجاد حادي

غاراتهم ترهي على الضد وتزيد
يوم الحرايب واشتعال الطرادي

لين العقاب اضفى عليها التماديد
من ضلع يام ليا خبوت الحمادي

عبدالعزيز موحد الدار توحيد
عوق الخصيم اللي على الكل سادي

يوم المغامد جافيتها المغاميد
وايمانهم من دم ضده مَنَادي

في رايته حماية الروس والعيد
ياما اتعبوا يم الحريب الجيادي

واضافوا الأمجاد شوخ ٍ وأتاليد
لين اعتلوا بالطيب روس المبادي

أماجد ٍ تبني للأمجاد وتشيد
تاريخهم في مرقب العز بادي

وسلومهم فيها بعيد وتباعيد
على الحمايل حضرها والبوادي

الضيف يومن الليالي سراميد
هم نور عينه عقب مس الجهادي

وبيوتهم للجار تشدي ضحى العيد
في ضفهم يرعى الطنف والجدادي

فيما مضى واليوم صيد ٍ بأثر صيد
هنادي ٍ ترث فخرها الهنادي

منهم محمد شوق منتوقة الجيد
النادر اللي مال راسه ملادي

محمد ذخر فيحان نمر الأواليد
راس ٍ ظهر من راس راع الشدادي

حر ٍ ليا ارقب مال طلعه تحاديد
ان شاش هام وهمت وان هد صادي

نجام لجام العياب المعانيد
غير المعالي مال راسه قنادي

كيزوم زيزوم العيال الصناديد
بالفعل قبل القول وفا وزادي

ماقلتها من شان قصد ومقاصيد
الا الصحيح وكلمة ٍ في فوادي