كسر خاطر

عجزت أنا أخفي دمعة بعين شاعر
لا من بكا قالوا .. صويبٍ ومطعون

تعبت أنا غربة .. وقلبٍ مسافر
يمر طيفٍ .. ماسكن قلب وعيون

تعّبت .. قلبٍ تحتضر به مشاعر
تعبت أناقض قلب عاقل ومجنون

أموّت كلمة .. والقصايد تناظر
حرفٍ قتلني .. وباقي الحرف مغبون

تعبت أجسّد صورةٍ بالدفاتر
وجه بخيالي وسط ناسٍ يمرون

تعبت أحيا بكل حبٍ واغامر
أرمي بروحي في متاهات وظنون

تعبت أدور بين كل المظاهر
حبٍ .. ولكن .. كل حبٍ بلا لون

تعبت اصدّق والخديعه تجاهر
والصدق .. ميّت بالحقيقه ومدفون

تعبت أنادي .. كنّ حولي مقابر
أصرخ وصوتي .. بالصدى يجرح الكون

أجي غريبه .. وارجع بكسر خاطر
أجي وأعوّد .. خافقي كله طعون