حيـيـت يـــا خـــــطٍ لفــو بـــه مساير

لـ غازي بن دغيم، ، في غير مُحدد، آخر تحديث

حيـيـت يـــا خـــــطٍ لفــو بـــه مساير - غازي بن دغيم

حييت يا خطٍ لفو به مساير
منشت مزونٍ بالمطر مستهله

خطٍ لفاني فيه حكمه وتعبير
جابه صحن ومروحه راعيٍ له

الخط من شوق البني الغنادير
سعد عشير اللي رموشه مظله

وهليت يا بن سرور حشمه وتقدير
ساعة قريت اسمك بصفح السجله

هليت به وحسبت لك مقصدٍ غير
واقول ينخاني وانا فزعةٍ له

احسب بلاك اللي نهوده مزابير
اللي مثل ضوح القمر لبةٍ له

ريمٍ ربى من بين ذيك العثامير
اللي يشوفه يفخت العقل كله

وثرك تعلم بالصقار الصقاقير
العرف ما يعرض على عارفٍ له

الجمس لو ينطق تعوذ من السير
كم خبةٍ فيها لقي جرةٍ له

ياما وراه يطيّر العج تطير
لام ابعد الميلاف عن شوف خله

ستين يومٍ للحباري مداوير
يوم الردي لا ابطى يجي فيه خله

هذي ارادت المعبود والي المقادير
الصيد جينا يا سعد مدهلٍ له

قنصنا من الارن شمال الى الدير
وجينا العراق ومدهل الصيد كله

شرق الغدف شرق الرويات والشير
يا زين والله يا سعد قنصةٍ له

اجوال في ذيك الفياض المخاضير
الطير سبقه كل ساعه يتله

لا شرّق وسمّر على الطلع تسمير
ينومس اللي فوق كفه يشله

ياما طلع منا عليهن مخامير
وضايف لهن والطيب من عادةٍ له

وردو اسودٍ ينطرن المصافير
ربعٍ على شوف الحباري مغله

وكثرت عذايرهن وفيهن مكاسير
وراع الوحش يفرح على علومةٍ له

وضحو بخورٍ ما وطيبه ولا زير
على مداس الجول في مرتعٍ له

والرزق عند اللي عليه التدابير
رزق الملا رب الملا كافلٍ له

واليوم يا بن سرور ذي ربطة الطير
والا الهداد الزين قد فات حله

والصيد راح امن السهل للمواعير
ووسط الطير هاذي يا سعد حومةٍ له

الصيف جاك وكل يومٍ معاصير
والقيض عقبه يا سعد مردفٍ له

زين أرباط الطير وحرص على السير
وكثر عليه البيض في مربطٍ له

ايام موقفت الضوامي على البير
اكرم بها طيرك وزين محله

لينه يزل القيض كله على خير
ونجم السويبع يطلع الفجر كله

عساك هاك اليوم مالك عواثير
بجاه من نسجد ونرفع ارضن له

وان قيل طاح من الوسامي مباكير
والصيد يذكر عيّن وعينتله

دن الحمر ومشو عساها مسافير
الطير قرنس والهدد منوتٍ له

وعليك بخوّة ناطحين المخاسير
انشد عن الطيب وكوبان خله

ترى الردي لو كان اميرٍ على امير
ترى ما ينفعك دقه وجله

عليك بالربع القروم المسافير
خطو ابلجٍ من رافقه ما يمله

هذا جواب مسخّر القيل تسخير
مثايلٍ تبري على العمس عله

تمت وصلوا عد وبل الشخاتير
على نبّيٍ نتّبع سنّةٍ له

© 2024 - موقع الشعر