راجي المغفرة

يالله يا خالق الدنيا وما فيها
يالذي كله الخلق ترجي رضاه

يارب روحي دخيلك لاتعنيها
راجي المغفرة لا تغيب رجاه

وارد من بالي امثال مسويها
هين الهرج مير التعب في بناه

مال البخيل الذي روحه مشقيها
ما معه فيد من ماله الا شقاه

لاهو لروحه ولا للي يواليها
وان شبع ليلة الصبح ينقص غداه

والشيمة اللي تلم الناس ناسيها
وان لفا الضيف ينشد عنه مالقاه

ماينعرف في أول الهجرة وتاليها
حظه الشين تقعد لواحد قفاه

والمال يحيي نفوس لا حيا فيها
مثل سيل الصبخ ما يطول حياه

والجود كم حلة عزز مبانيها
وان فني صاحب الجود ذكره وراه

كثير وصف الرجال وما اقدر احصيها
قسم الله وكل عطا ما كفاه

قاسيت الايام مثلي من يقاسيها
يوم مر يجينا ويوم حلاة

ولقيت امر الليالي يوم الاويها
العسر للرياجيل قيد الحياة

كم علة جاتني وامسيت اداريها
مستعين (ن) بربي على كل جاه

وكم حاجة قستها وازريت انا فيها
والذي انا فيه عند غيري كماه

روحي تحب الشرف والوقت يثنيها
لين تمشي على لين والا قساه

امشي على جمرة النيران واطفيها
وابعد النفس عن عيرة اللي خساه

لوكان تطحني الايام ما احنيها
راسي اللي تناطح سماك السماه

واطلب الله وانا في سجدتي واخفيها
داعي الله ولا خاب من هو دعاه

وازكي صلاتي على المختار واثنيها
الذي كلنا نتبعه في هداه