يالله ياعالم

يالله ياعالم بسر العبادي
ياللي طليع بمايكنه فؤادي

ياللي تحل المصعبات الشدادي
والعبد تحت امرك تميته وتحييه

يارب لا جا الموت هون عذابي
وليا وصلت القبر ثبت جوابي

ويوم الملاقا بك تخفف حسابي
جالك وسيع وكلها الخلق ترجيه

يارب انا فرطت بعض المعاني
واكثر بلايه من حصايد لساني

مجبور اساير مع كمايه زماني
مره نصيب الدرب ومرار نخطيه

هذا وانا ودي برد المثايل
وامسيت افكر في كثير المسايل

ولا انها مابين عدل ومايل
واحتار قلبي في الزمان وطواريه

احترت في النمام راع المصايب
نقال هرج الشر بين القرايب

ما يدري ان الله شديد العقايب
يمهل ولا يهمل عسيرة ملاويه

يدور المنقود في كل وادي
يسعى مع الكذبان سارح وغادي

تلقاه بالنمات دايم ينادي
يالله تكفينا ا ذاه وبلاويه

واحترت في الكذاب يا كثر كذبه
وجهه كريه وعلته وسط قلبه

مكروه بين الناس ماله محبه
وليا جلس بالكذب حلل قهاويه

تلقاه في ربعه كثير النشوب
ما يفرح الا بالفتن والعطوب

وليا نصحته يعتزي بالسبوب
خله وترك مجلسه لا تجي فيه

واحترت في جنس خسيس الفعال
أهل النفاق موسعين المجال

قلوبهم سودا سواد الليال
ترى المنافق مالقينا مداويه

واحد ليا منك لفيته وجيته
تنصاه في بعض العلوم وبغيته

تلقاه نايم مقفل باب بيته
يقلون هذا الوقت ماانته بلاقيه

وبعضهم يبحث علوم جديده
اللي عن علوم القبايل بعيده

كل يبي يحكم على مايريده
حتى ينفذ علمه اللي يسويه

وراحوا هبا منثور في فج غاوي
ماشانهم غير الشيش والقهاوي

والا مجالس للضحك والشهاوي
واللي يشوف الدرب له ناس تغويه

وما عاد للعاقل مكان ومهابه
وراع النصيحه ضاع نصحه

زمان متغير على كل جابه
حتى عيال الرجل نسيوا مواضيه

وشيخ القبيله ما بقيله رفاقه
واحتار في كذبان قطاع ساقه

نفسه تقوده للمعالي عشاقه
واللي على العليا عزومه توديه

حنا نبي سلم العلوم القديمة
اللي قواعدها شهامه وشيمه

وقلوبنا تبقى نظيفة سليمة
موقف شرف للروح والناس تطريه

لكن يامسنادنا يا زبنا
يا للي طليع وتعلم السر منا

رحمتك وسعت كل شي فعلنا
وانته ولي الكون واللي خلق فيه