تهب الرياح - علي بن بلال اليامي

تهب الرياح ويربح اللي ذرا فيها
ومن لاذرا فيها تعداه الارباحي

والايام وديان طوالٍ محانيها
تعرضت انا ماشاح فيها ومالاحي

بلادٍ نصابحها والاخري نماسيها
لطاب نوم اللي علي الهون يرتاحي

تجزعت من دنيا عسي الله يكافيها
ضحوك عواقب ضحكها يمرض الصاحي

جياعٍ ذيابتها شباعٍ حصانيها
تعز الردي وتذل كساب الامداحي

ولا اقصد شبعة عزيزٍ يزكيها
انا اقصد بها ناس عنيين وشحاحي

تميح اللين انك من الجم تسقيها
وتطوي عشاها وانت في البير مياحي

وغناة محروم تلحق اللوم راعيها
لها الوارثين وهو لجذاب الارواحي

انا اشوف ناسٍ زود الاموال يطغيها
وهم ماخذوها يوم الانياب كلاحي

وجيه السرب اللي يخيب الرجاء فيها
كبار الكذاب مكثرين التمداحي

رجال بوقت الضحك تكبر عزاويها
تهبد الصحن وتفطح الهرج فطاحي

وعند الازوم يبين للناس خافيها
يضيعوون ويجي للعزاوي تبطاحي

ومن لاعرف كدر المعاني وصافيها
غدره الزمان الشين في ثوب مزاحي

والانذال لوبالمال تنفخ علا قيها
يضيعون عند الحساب كم جاء وكم راحي

وتري كل من له عادة مايخليها
لجاء الزمان اللي هبودٍ ورماحي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر