المكان

لـ عطاالله فرحان، ، بواسطة فهد الخرجي، في غير مُحدد

المكان - عطاالله فرحان

انا كل شي في هذا الزمان وعامل احسابه
ولكن ماعملت حساب بيوم افارق عيونك

لقيتك بس ضيعتك وكن الكون متشابه
اجل ماهي غريبه لاعدى عاقلك مجنونك

يناديك الخفوق ارجع يا اول واخر احبابه
وتمناك العيون اللي نظرها سارقه لونك

ترى مايقرب العاشق لمعشوقه سوى غيابه
ياقربك والدليل ان بخفوقي زادت طعونك

تذكرت المكان اللي بدينا وانتهينا به
وذكرن بوقتها كل الكلام اللي وقف دونك

ياكثرك لاطرى نسيانك وحدتني اسبابه
تجي كنك غزو تفرض مواعيدك وقانونك

لقيت بقربك الدنيا وغيرك ويش ابلقا به
تفضل جيت اقهويك القصايد واشرب بهونك

وتعزوا بي اليا من ضقت وغيري لاتعزوابه
ترى ما استاهلك لامن هقيت وخابت ضنونك

حبيبي او حياتي او خذ العمر وتسمّابه
تصدق كل ماتطري اقول اموت ماخونك

اذا هي بالغلا محدٍ سواك اغليه واشقابه
احس الشوق ياخذ من حياتي يوم يطرونك

كفا غيبه وعلمني وش اللي فيني اتهابه
ترى كلي ضعيف اليا سرحت وضعت بعيونك

فهد الخرجي
© 2024 - موقع الشعر