المجلس اللي ماجلس فيه عقال
أحسن لك انك تبتعد عن جلوسه
أما سمعت اهروج تزعلك فالحال
ولا صبرت بهرج ناسن تحوسه
ولا دخلت بلجه القيل والقال
وارخيت نفسك للعلوم الغموسه
ياهيه ياللي تلبس اشماغ واعقال
ترى الرجل مايشتهر من لبوسه
ليا ثبت طيبه من العم والخال
وابوه طيب مستحيلن طموسه
وان مال كلن ينقده بعد مامال
ليا ارتخت وقت السوالف اعسوسه
يصير بين الناس لو كان رجال
مطامع اهل الطيب فيه امعكوسه
يحسب ولا ينعد في بعض الاحوال
ضرسن يضرك لادخل فيه سوسه
ذي الحقيقه عبر الابيات تنقال
نصيحتن فعلا الصواب امغروسه
ميصالها العاقل ماتاصل لجهال
اهل الجهل عن الصواب امحبوسه
محدن يلوم النذل والجاهل ان عال
ولاحدن يعده في الليال العبوسه
ومذاهبك تنقدك ياطيب الفال
ساعة يروسك قدرها ماتروسه
اسمك كبير ولانزل كل منزال
رفيع وان حول يامصعب نكوسه
هاذي نصيحه او مثل ظمن الامثال
تذكير والمهمل يراجع ادروسه
لاينزل الوادي ويغرق ليا سال
ويصير في غثو المسيله غطوسه
في غبتن تسبح بها روس الانذال
ناسن بهزل الهرج دايم ندوسه
سواق باص وحملته كلها اطفال
احدن يعشق واحد ابنصه يدوسه
لو عالوا العقال لاعاد تهتال
اليوم كل الخلق حوسه ودوسه
قرادة في الخلق مدري سعت بال
كلن ماهمه غير وفرت افلوسه
حجم الخطاء يحسب ولونه والاشكال
على فطينن كل علمه يقوسه
ماكل شين ينسي بعد مازال
لالج ضرس الراس لجت اضروسه
وكلأ يفضل قلعت الضرس في الحال
مادام لج اضروس راسه جلوسه
والهرج لا عدا وراء حدوده وطال
تسمجك حلاته لاطلع من احبوسه
ويضيق منها الرجل وانحط معدال
يصعب رضاه ليا تقوت احموسه
ماهوب طفلن يزعله قيمه اريال
ويرضى ليعطيته على الخشم بوسه
والمعذره للشعر مخرج ومدخال
ويرجو السموحه كانها اخطت اهجوسه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.