أخذت لي في وادي الفكر منزال
عند الظلام وداجي الليل توه
وأدرجني الواهس على بدع الأمثال
زان القصيد وولع القاف ضوه
وغنيت لي عن نزعة الضيق موال
وجريت موال الندامه بقوه
نعم بغنّي وانطرب وأبهج البال
وابدع مادام الراس في عز جوه
لا هادمٍ واقع ولا باني آمال
اللي تبي ياعمر لا باس سوه
تعبت ياوقتي وأنا أحط وأشتال
ماعاد به شيمه ولابه مروه
على قلوب الناس منته بمحتال
يامبدل الخوه بخمسين خوه
ماني بمن يمشي على هافي الجال
ولا أنثر الفنجال في وسط دوه
أضحك على جيلين وأسبق أجيال
وأنافس أول جيل وأقول توه
اللي فهم رجال وأقول رجال
واللي جهل لا يحسب إني عدوه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر