يامن ياعاوني - عبدالعزيز البسام

يامن ياعاوني علي بعض الافكار
افكار بيت الطين شرحه ومعناه

يسمون بيت الطين يامسندي دار
الاسم عم الدار كله ومبناه

اولهن القهوه مصاريع ووجار
ودلالٍ يسمونه معاميل مركاه

ونقرةٍ قلعه من تحت الاحجار
والطاق هو والمحكمه مع امسواه

ومبرد القهوه ومحماس له كار
والملقمه والمبهره عند مصفاه

والقبه اللي به روزان الاسرار
مثل الفروك ومكحلت عين ودواه

ووتاد يصلحهن بقدوم نجار
يعلق به الملبوس لجله ركزناه

والورد يمشط به صغيرات وكبار
وقبة اصفاف البيت للعيش ورحاه

والتبرقه وعويده اللي للذكار
ومنخاس من عند المخفه لفزناه

وجصه وصوبه ثابتات بهالدار
وحجات مصفوفه زينه مسواه

والكر والمطحن لهن ذكر واخبار
والكل منا مادرا ويش يقفاه

وقوتاله تكشف له الباب والمار
والا السماوه منور البيت تلقاه

ورواشن المصباح له دور ودوار
وغريفة المنفوح بسطح مبناه

والمغرفه والموقعه نبت الاشجار
والصفحه اللي من خشبنا نجرناه

والباب فيه اخبار واذكار واثار
فيه القلاقل حافظاتٍ لمجراه

والسرج من صنع التنك هو للانوار
يطفي من ادنى شي لاجاه طفاه

والزند والخلخال للوقت تعبار
وبربوش والخشخاش لساق يزهاه

وخصور وزميم يعلق بشنكار
ومقمرات من المجاول ومطواه

اسمع وخلك من اهل العرف والكار
اخبار من قبلك قل الحمد لله

صلو علي المختار ماهل الامطار
او عد مادهم السحايب نثر ماه

© 2024 - موقع الشعر