يالله يامن تلهج الخلق بسماه

لـ حسن عامر، ، في الحكمه والنصح، آخر تحديث

يالله يامن تلهج الخلق بسماه - حسن عامر

يالله يامن تلهج الخلق بسماه
ماخاب من بسمه كثير الرجاوي

ربٍ كريمٍ تسجد الخلق لرضاه
سبحانه الرازق كريم العطاوي

تفرج لقلبٍ واهج الهم يصلاه
مثل الوحيد اللى بقفرٍ خلاوي

الوقت صوّب فيه رمحه وشلفاه
ودارة عليه من المحن والبلاوي

راح الرفيق اللى كرام سجاياه
شهم على جمع اللوازم مخاوي

مثل ذياب الخيل صيته وطرياه
والمسك والعنبر وعود وجاوي

انشهد أنه مسند الجنب ودفاه
فاليسر و الشده صليب الدعاوي

يقوله اللى عالي الرجم عداه
وطرى عليه من المثايل طراوي

عسر الزمن جيش علينا رزاياه
مثل الرديني فالكبد والكلاوي

لاواحسافه يازماني حسافاه
هذا زمان اهل الدجل والرشاوي

البوم متصيقر والاحرار تتلاه
والنمر بس وعوّد الذيب واوي

لاتنتخي في من يقصّر بيمناه
الله يغني عن ضعاف النخاوي

مع البعيد يجود بالمال والجاه
وللاقربين يحطّ فيها ملاوي

قولوله يدفّي يدينه بمخباه
ماقبل في المنّه لو ابيت طاوي

واحد في اللازم تمرّ وتعداه
حيث أن فزعاته بلوت وقهاوي

ياكم واحد فالمهمات تنخاه
لكن يخيّب نظرتك والهقاوي

ماكل من يوعد يوفّيك بحكاه
الفعل يفرق عن كبارالحكاوي

وماكل جرحٍ ينفع الطب لدواه
بعض الجروح يحير فيها المداوي

ولا كل ذيبٍ ذيب لو يرهب عواه
ولا كل طيرٍ له مخالب نداوي

ولاكل من يفتي نصدق بفتواه
ياكم سمعنا من غريب الفتاوي

كبّ الذي يشبه لعنتر بمركاه
وعند الشدايد مثل بس يماوي

ماكل من يرمي يهدّف بمرماه
كم واحدٍ يرمي وطخّه سماوي

ولا كل من سمي بحاتم حلاياه
ولا كل عدٍ للموارد رهاوي

ولاكل من جرّ المواويل بغناه
قلبه من البسطه شفوق هواوي

يقوله اللى قاسي الوقت ربّاه
وبيّن رفيقين السعه والرخاوي

حسن عامرآل عيسى
© 2024 - موقع الشعر