الشاعر الأول - عبدالرحمن بن مساعد ال سعود

قرّر التاجر يكون الشاعر الأول
افرحوا يا اهل القصيد وجهزّوا الساحه

سهلّوا الأوزان ل اجل المبدع الأفضل
بعد إرهاق العمل يحتاج له راحه

فاضي هو يوزن ؟ .. كلامه كامل مكمّل
يكفي انّه ل اجلنا يكتب عن جراحه

الكسر فاسماعكم وادراككم يجهل
عبقريه فرحته والفن في نواحه

جدّدي له يا صحافه عهدك الأمثل
وارسمي الأشعار صحرا وشعره الواحه

واكتبي عنه العظيم الشامل الأشمل
كان يحتاج الشعر جهده واصلاحه

واسألي كيف ومتى وهل كان أو يعقل
عمرنا من غيره فكره تكمل افراحه ؟

وين "نوبل" عن قلم من أشرق واشعل
ظلمةٍ كنّا بها أفناها مصباحه

من يقول إن الشعر في وقتنا مبهذل
سعرنا عقب الخساير زادت ارباحه

لحّنوا الشعر البديع الأصعب الأسهل
واعرضوه بكل شاشه ليل واصباحه

وادفعوا للي شدا للشاعر الأجزل
مبلغ وقدره "كذا" يستاهل صياحه

ابشروا يا مطربين الدفتر الأجمل
يكفي عن مُرّ السؤال وذل إلحاحه

دفترٍ فيه القصايد تشتري الأخطل
وعنتر يضحّي بعبله ويرمي سلاحه

دفترٍ فيه المعاني في اليمين اسفل
أقوى أبياته : فقط لا غيري في الساحه

© 2024 - موقع الشعر