بشر عن أحوال السديري - عامر بن نوطان

قصيدة في الأمير محمد الأحمد السديري
يا قادم من نجد وش جبت من خبر

بشر عسى الأيام ما هي بمايله
بشر عن أحوال السديري وصحته

عقب المرض وش صحة الشيخ قايله
يا الله أنا طالبك يا سامع الدعا

أدعوك ياللي ما بعد خاب سايله
تشفي الأمير اللي يوصف به المثل

كريم في وقت قليل صمايله
مثل النهر ما هي تعدا ضميته

لا جا له العطشان يبري غلايله
النفس من علم لفاني تأثرت

والعين دمعتها على الخد سايله
الله لا يحرق حطب الأرض كلها

رجيت رب ما يخيب رجاي له
حلفت لا بشر بشير يقول لي

إن أبو زيد عنه الأوجاع زايله
مجار يا بوزيد من وعكه المرض

جعل المرض عنك تقفي رحايله
عز الله أنها لازمتني زيارتك

لكن ظروفي عن زيارتك حايله
صوب السديري من يوصل رسالتي

واجزاه بالمعروف واشكر فضايله
رجل الرجال اللي حوى المجد والشرف

زبن المخيف اللي يدرج هزايله
سلام مني عد ما ذعذع الهوا

وعدد وبل هلت الماء مخايله
للنادر المشهور بالطيب والوفا

أطلب من المولى يطول مهايله
زان المثل باللي كلامه يشوقني

وارسلت له عسى تجيني رسايله
أعتز في رسالته وأفتخر بها

كني بخطه كاسب كل طايله
رجل له الطولات يشهد سجلها

كل الرجولة سجلوها بفايله
كم ثاب مضهود وفرج لمبتلي

وكم من ضعيف راح يشكر جمايله
طموح نفس يطلب المجد والعلا

وقول على البرهان تظهر دلايله
كلف على كسب المعالي مطيته

يسري لها ليله ويسهج قوايله
بالنايف العالي قصوره تأسست

وطلع على الانظار كل يخايله
من قدم الجودات تشهد له الملا

وقول بلا فعل كذب فيه قايله
زيزوم فرسان عريب جدودها

من ساس تربة نجد وأطيب حمايله
قبايل يعتز من يلتجي بهم

يوم الدمي من مضرب الشلف سايله
يمشون بالخنجر وبالسيف والقنا

بيوم يشيب بالولد من هوايله
يوم السنين اللي بها يعرف الرجل

ويظهر كديس الخيل وتبين أصايله
تاريخهم يشهد وتشهد فعولهم

من كان يمدحهم صدق في مثايله
وذكرت رب في صلاتي سجدت له

الدايم الباقي والأرواح زايله
وصلاتي وتسليمي لصفوة البشر

على رسول وافيات خصايله
© 2022 - موقع الشعر