بعت القعود وقالو الناس مجنـون - ضيف الله مغرق المرزوقي

بعت القعود وقالو الناس مجنون
بيعتك في ولد الجهامه خطيه

احسن تبيع اللي لها سيف عرنون
اللي على الحيضان سوت اذيه

كل العرب منها ترا اليوم يشكون
ساير وبن راجح يقولون هيه

وش رايكم ياسعود فاللي يقولون
نصيحة منهم تراها قويه

هم مادروعن حبها اللي مالي الكون
عندي ولو قالو عليه رديه

مابيعها لوقيل يثنين مليون
مفرودتن والجرم جرم الثنيه

ورثن لبوي وجدي اللي على الشون
ماخذتهابقروش ولا عطيه

امشي مماشيها على العسر والهون
واسوقها بارضن نبتها نصيه

بدارن خلا يطرب لها كل محزون
ماداجها الدواج وقت العشيه

هاذا كلامي في القصيده وموزون
آخذكلام الطيب واترك رديه

وان كانها ياسعود من دون في دون
اهديتها لراع المعانق هديه

رد الشاعر سعود الدهيمي
بعت القعود وجعل ما أنته مديون

يامرسلن نقو البيوت الطريه
لانته بمجنونن ولانته بمغبون

بيعة حلالك مابها منقديه
بعض العرب عن بعض الاشيا مايدرون

تغرهم بعض الامور الخفيه
وسعيد والمكحول مهمايقولون

كلامهم منساق من حسن نيه
ماقصدهم في ماتسوي يعيبون

ولايلحقون اللي فعلته زريه
لاكن يبون النصح والنفع والعون

من واقع الخوه وزود الحميه
قالو مادام الزود في السعر مضمون

جعل المطيه فدو راع المطيه
ولا ترا بكرتك للي يعرفون

زينة وصوف وفالطبوع اجوديه
لو مد فيها راعي المال عربون

ينرد عربونه بنفسن رضيه
واللي يقول الربع منها يصيحون

مخطي وحنا ماندان الخطيه
ربعك عليها في غيابك يدارون

فعل الخوي اللي يقدر خويه
وكانك بتهديها منزه ومصيون

تهدي وابو غانم كفو للهديه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر