ياعَرّابة

لـ مفلح نجم، ، في الغزل والوصف، 20

ياعَرّابة - مفلح نجم

هلابك والسنين اتْمُر وانتي عمري الباقي
ياعَرّابة (من اول نظره الحب انفتح بابه)

هلابك واللقا صدفه. ترى بعض الصدف راقي
يا.. أول من سمح للشوق يسريبي على اهدابه

عساني م انْسكبت الا حبر في زحمة اوراقي
عشان ارضي غرور اللي يموت العمر فغيابه

وعسى بعض الحروف اترجم اللي احتار بٌ اعماقي
وسلمني لذيب لاعوى ماترحم انيابه

وعساني ياعساني م انكسر ياحضرة اشواقي
وانا..ادري بالحنين ليا تزايد شقق ثْيابه

يعاتبني على صمتي وكنه يجهل اخلاقي
ياليته يدري ان اسباب صمتي كله اسبابه

تحملت الغروب اللي بكى من ظُلْمه اشراقي
وميعاد السراب اللي فقد من صبري اعصابه

تحملت ادفنه خلف الضلوع وْسْط خفاقي
والد بشوفي الْغيرة مع ان عيوني كذابه

تحملت انسجن في صمت لين يقرر اطلاقي
وانا حريتي بدونه سؤالٍ ماله اجابه

احبه لين مايبقى غصن رزقه على الساقي
واحبه لين مايبقى حروف وحبر وكْتابه

واحبه لين راس طويق يحني راسه الراقي
ولين المسلم يصلي على فرعون واقرابه

احبه كُثر ما. ربي خلقنا شعوب واعراقي
وكُثر دعواتنا للواحد اللي نحسب حسابه

وكثر ما فالصّدور مْن الوجع واهموم وارهاقي
وحلم وطيش وانفاسٍ تطارد كنها بغابه

احبه وانتهى الموضوع دامه عمري الباقي
وأكِّدْ.. له(من اول نظرة الحب انفتح بابه)

© 2024 - موقع الشعر