نعنبو حاجة تحدك على وجهٍ كليف - مفلح نجم

وجدحالي وجد عودٍ بلاه الله كفيف
دارت الدنيا عليه وفقد حتى عصاه

كنه الا ذيب يعوي بعد فرقى وليف
صوبوه بوارديه على سبة عواه

اشهد ان الوقت كفه مهو كفٍ نظيف
وان عطى ياخذ من العمر ضعف اللي عطاه

واشهد ان الطيب في هالزمن وضعه سخيف
عزي الْمن صَدّق الناس واعطاهم خفاه

ماتدوم الا لرب السموات اللطيف
القريب المستجيب الْ دعاوي من دعاه

يالله اني طالبك وانت تدري بي ضعيف
لاتوَقفني على غير. بابك والنجاه

ياكُثُر. م اخطي واتوب وكثر ماني عفيف
وياكثر ما يجلد الذات تأنيب العُصاه

مايرد الموت مالٍ ولا قصرٍ منيف
وان بكا غالي ولو سَيَّل الوادي بكاه

نعنبو حاجة تحدك على وجهٍ كليف
ونعنبو من رد محتاج .أو(مَنْ) بعطاه

صاحبي ياللي تَنَشد عن اسباب النزيف
وليه انا جلد و عَظْمْ ميتٍ ياخذ عزاه

انشد اللي جوف صدري لها مثل الحفيف
مالها موسم ولا تخضع لمكر الدهاه

لا طرت لي قمت من عز نومي مستخيف
مثل طفلٍ فاقد امه وهو باول صباه

بري حالي يوم قفى وقلبي له رفيف
كَسَّر ضلوع الصدر مايبى بعده حياه

ادري ان العمر محدود ياعمر الخريف
وادري ان اقدارنا سطّرت فوق الجباه

مير انا مخلوق واجزع ولي قلبٍ رهيف
كيف مَجْزع والمقادير ما اعطتني بقاه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر