يالفطين احذر يعكّر صفو جوك!

ياالفطين احذر يعكر صفو جوّك
واحدٍ شبّ الفتن شربه وقوته

مدعي نصحك ويخلص مع عدوّك
اسفهه واعطه براس البوت شوته

الذي في هرجة الغيبه يلّوّك
لوكفانا من غثا علمه سكوته

كل يومٍ في مشاويره يدوّك
ينشر الفتنه مع لعبت بلوته

جعل راسه يضربه صفر المشوّك
طلقة من كفّ رامي ماتفوته

ويا معارضني بنظم الشعر توّك
البحر ماضاق من قرشه وحوته

اسرج حصانك وغير وشبّ ضوّك
وخذ كلام الصدق ومبيّن ثبوته

لين يتبيّن دنوك من علوّك
واعرف أن اللحن له نغمه ونوته

لاح براقك قبل ينهلّ نوّك
ياشبيه الذيب في شكله وصوته

حسن عامرآل عيسى