أبوي ...

رباني الي طيبته مالها حدود
رجلاً زرع من نبل الأخلاق فيني
 
كلي فخر إني تفرعت من عود
أصله كريم ويكفي إنه "غسيني"
 
أبوي اللّي منه يتعلّم الجود
على نهج يمناه سارت يميني
 
اللّي مثل "سالم" بها الناس محدود
يكفي شموخه وكبر قدره بعيني
 
يفداك كلي يا بعد كل مفقود
رحلت ما وفيت لك ربع ديني
 
ليت الحياة تدب بك يوم وتعود
وتشوفني صاير مثل ما تبيني
 
رحلت لكن داخل القلب موجود
غايب ولكن كل لحظه تجيني
 
تنبت تفاصيلك على ذكرك ورود
وأتخيل بحظنك .. تلفك يديني
 
يا رب ما غيرك بها الكون معبود
إرحم أبوي الي بأرضك دفيني
 
حرّم جسده، الي سجد لك، على الدود
وإجعل كتابه بالحشر في اليميني