بالـفـراسـه تـعـلـمـت

لابالدراسه بالفراسه تعلمت
وعرفت معنى الداي وآخر علاجه

صوتٍ يناديني خفاء كل مانمت
مافي عباراته خطأ وأزدواجه

وبأحدى الليالي جيت يمه وسلمت
قلت أنشده عن حاجته وأحتياجه

أصغيت له بالسمع حتى تفهمت
معنى رضاه وغايته وأحتجاجه

وعاهدت مرسوله وله بالوفاء أقسمت
قال: أستمع لي؟ قلت: يافكر ناجه

قال: الزمان؟ وقلت: لو ماتظلمت
زيفه نفيته وأحتواني عجاجه

قال: السعاده؟ قلت: في طيفها همت
ماذقت منها ساعتين أبتهاجه

قال: الحياة وناسها؟ قلت: حرّمت
ما أثق بأحد والكذب عيب وسماجه

قال: الصداقه؟ قلت: عنها ألزم الصمت
كلٍ يبيع ويشتري في خراجه

قال:القرابه؟ قلت: باللوم والشمت
هم عاصمة سوق الكلام وحراجه

قال: المجالس؟ قلت: عنها تشيمت
نمّه وغيبه وأنحدار ولجاجه

قال: أن سمعت العلم منى. تقدمت
حث الخطا تجتاز عنق الزجاجه

تسعد اليا صلّيت للخالق وصمت
وصدقت مع نفسك على كل حاجه

ورضيت وأرضيت الضمير وتوسمت
الخير.. يظهر لك بشير أنبلاجه

معنى الثقه؟ قناعتك. وأن توهمت
أطعن ظلام الليل وأشعل اسراجه

لا تذكر أبسط ماقفٍ به تندمت
بابٍ يجيب الريح حكّم سياجه

وأذكر اليامن .. من زمانك تشأئمت
أن الزمن كم حي سبب احراجه

أن كان بوجيه الهواجيس سالمت
جت لك مثل سيلٍ يهيل لأنزعاجه

معنى أنقيادك؟ يعني أنك تحطمت
وأعلن بك الدرب الطويل أنعواجه

والياجلست أحسم وخاصم الياقمت
خل المناظر غصب يضحك حجاجه

أن طاف وقتك وأنت له ماتغانمت
مابعد صافي عذبه.. الاّ هماجه

وأصبر لو انك من زمانك تألمت
ماضيقٍ الاّ من وراه أنفراجه