نمه وغيبه

المجلس اللي فيه نمه وغيبه
ماني بمجبورٍ على جلسة فيه
 
لو اجلس لحالي براس الجذيبه
بارض فلا عجه تتابع ذواريه
 
اخير لي من مجلسٍ ما اهتنيبه
ماغير قيل وقال هرجٍ ما ادانيه
 
الله ولا عرف الردي ويش ابيبه
اللي علي يمن فنجال شاهيه
 
أعز نفسي مارضيت الغليبه
أموت وافنى مالحقني مشاريه
 
ومن لا يعز النفس يبشر بخيبه
كرامته تنداس لو هو برجليه
 
وعز الرجل نفسه ترى مايعيبه
عزه لنفسه يرفعه عند واليه
 
العيب ياللي جاهلٍ بالمعيبه
تقدير شخصٍ عدك شراك نعليه
 
من لا يراك الراس وش ترتجيبه
من لا يراك الراس حذرا تماشيه
 
اترك مجال النذل لا تشتقي به
اترك مجال النذل لا عاد تطريه
 
محدٍ ٍعليه بجابرك بالغصيبه
تلفى طريقٍ غير دربه وتمشيه
 
تلقى مع الأجواد من تعتزي به
وقت الشدايد صاحبه مايخليه
 
لا من نخيته بالليال العصيبه
يفز مثل الصقر من كف راعيه
 
من رافق الطيب تطيب بطيبه
ومن رافق الخايب يخيب مساعيه
 
هذا وانا اللي مارضيت الغليبه
أحيا واموت ومالحقني مشاريه