الهياط ؟!! - عبدالعزيز طلال العقيبي

بس لمتى يا قوم حنّا و حنّا ؟
مقياس تمييز البشر بالفضايل

المرجله ما هي بشيله تغنّا
المرجله تقوى و عرف و فعايل

امّا بكثر الهرج لا تمتحنّا
مانت بكثر الهرج للمجد طايل

ياكم واحد بالمهايط ذبحنا
و بحزة الميقاف قام يتمايل

واذا تجمّل ما سترنا فضحنا
من مجلس لمجلس يعد الجمايل

ما بين سويّنا و جينا و رحنا
وين انت يالمداح هات الجزايل

سلم على اللي قبل ننطق لمحنا
مبشرً بالخير و للضيق زايل

اذا تجمّل ما بغى الا فرحنا
من طيبته. عنا يشيل الثقايل

هذا يشّرف شعرنا لا مدحنا
ولا الردي للمدح ما هو بنايل

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر