يمسحوا بكرامتك البلاط - ريمون سليمان

يمسحوا بكرامتك البلاط
ولما تمشي يكلموك عن الحب

يتعمدوا معاك السكات
ولو صرخت اتهموك بقساوة القلب

تحب تراب رجليهم
يعاملوك أسوء معاملة

تفضل تاخد بالجزمة
ومايحنوش لو حتى مجاملة

تصرخ بدموع في عينيك
كفاية قسوة المرة دي

قسوتهم تعلى عليك
وتجاهلك يبقى العادي

هو إنت بتعرف تحب؟
حسّيت بيّ وعندك قلب؟

بتحب، بس تحب في غيري
بتحس بس تحس بغيري

أنت تحب وتحس الكلب
لكن أنا لا

أنت تموت وتحب الغرب
لكن أنا لا

مَش عايز أسمع منك تاني
جملة بتحشر فيها الحب

كنت كتير كداب وأناني
تقولي وحشتك ويطلع كدب

مشاعرك ليّ سمتها الضعف
أو تهييس

وأنا أعديلك زي البقف
مسكت في حبك لاخر وقت

بطلب قربك طول الوقت
ولما بعدت رجعت

رجعت أقولك إني تعبت
أنا محتاج لك لما بعدت

وزي العادة قلت كلام كان أجمل رد
قلت إن إنت في بعدي إرتحت

جاي دلوقتي بتكلمني
وتعلمني

وبتقول حب
ماتتكلمش وتنطق حب

انت لا بتحب ولا عندك قلب
بعمد قصدت تكسر فيّ

كل كلامك جرح فيّ
وكنت أنا بصرخ مابتسمعش

أبكي تقولي إلزم حدك ماتزودش
كتير فهمتك تعبت تعبت

وإنت حجارة ماتتحركش
فاكر كل كلامك ليّ؟

أنا مابقلش أنا ماسمحش
كأنك راكب بتسوق جحش

مسكت في حبك بكل ما فيّ
لآخر وقت تجرح فيّ

مَش احساسي ده كان قتلك ؟!
خوفي عليك بيسبب جرحك؟!

إنت أخر إنسان يتكلم
ويقول حب أو إني وحشته

جرحك جوه في قلبي معلم
ويوم ما أنا سبتك

يوم ماقفلته

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر