تعال عانقني

وين انت ياللي رابيٍ وسط الاعماق
ياللي حنيني ل باب لقياك طارق

الوقت دونك ماله بدنيتي سياق
واصبح طريق مؤديٍ للطوارق

ما غير اصور حالتي فبيض الاوراق
علك من الاهمال تقبل موارق

ياللي ب غيابك ما هدا بالي وراق
وياللي بحضورك بان نور المشارق

وياللي الوفاء ملبسك وبحضرتك لاق
يوم البشر ما بين مخلص وسارق

وش غيرك ما انت ب على الوصل سباق
وصاير عن عهود المحبين مارق

ترى المشاعر باغيه ود وارفاق
واصعب جروح القلب من شخص وارق

وغيابك اللي سيفه يدق الاعناق
نكس لجيش الوصل سبعة بيارق

ما عاد باقي للهوى منه ترياق
كود امنيه ووقوعها شي خارق

بقولها واللي قسم كل الارزاق
ما عدت اشوف ان فيه اية فوارق

تعال عانقني ترى الكون بي ضاق
واخمد لهيب غياب للقلب حارق

مدري عناق موادعٍ عقبه فراق !
ولا معانق شوق عقب المفارق

ما صرت مثل اول تجي دوم مشتاق
وانا ف بحر الشوق عالق وغارق