ما فيه داعي للإزعاج

قولوا معي ما فيه داعي للازعاج
النفس طابت والليالي قصيره

عمر البنادم خط واحد ومعراج
بين الديار الاوله والاخيره

وانا هنا مانيب واعي ولا ساج
متحفزٍ لأ يامنا المستديره

اشيل همٍ في كنين الحشا لاج
ما عاد باقي غير ابيح السريره

ما عاد من ضيقات الايام مخراج
الله من سود الليال العسيره

حتى شفا هداج ما عاد هداج
امسى بديره واصبح بغير ديره

عليك يا ملغي عماتيم الادلاج
يا راعي المدات شوق الاميره

الصاحب اللي عاش عمره ولا داج
شبلٍ ما ادور في الرياجيل غيره

لاجله تركت بيوت الاجواد مسهاج
من غير قاصر في رجال العشيره

يا سعود هقوات الرياجيل دلاّج
والورد يكفي منه ريحة عبيره

سلّمتها والباب ما فيه مزلاج
رسالة وسط الضماير كبيره

اما تعود وريحها بالرجا عاج
ولا تضيع وجعل في الامر خيره