الزين متبوع - سلطان بن دحيم العطاوي

على غرار الزين في الناس متبوع
جيت اتبعك من دون لا اعرف قرارك

ولهان ومضيع وطن ميتك جوع
هذا مساري وانت حدد مسارك

يالغالي اللي كل ما فيك ممنوع
حتى المشارك ما يجوز المشارك

انته جمالك نوع ما يشبهه نوع
سبحان من سواك جل وتبارك

اول اقول انك مثل حبة الكوع
واليوم صرتي شي ما ينتدارك

ناديت ابيك بصوت واضح ومسموع
طمعان في لمة ذهبك ومحارك

حبك بقلبي يالغلا لاعني لوع
متقسم مع هيبتك واحتكارك

يسري بي الخفاق وادل واتوع
وارجع لدارٍٍ ضمتك مثل دارك

ابني بها مشروع واهد مشروع
واخوض في ضفة غلاك المعارك

حبي عرضته دوك مثني ومربوع
هذا قراري وانت عطني قرارك

© 2024 - موقع الشعر