مدورين المدح

إن ماقدرت تصير محزم ورشّاش
مالك ومال اللي مشى معْ ضعنّا

خلّك على فالك ولاتفرش فراش
عساك تنعم بالحياة وتّهنّا

صوت الرعد يدوي ولارش برشاش
أخايل مزونه نحت عن وطنّا

‏يمدورين المدح وافعالكم ماش
وامكثرين القول حنا وحنا

المدح له قانون ماحاشه اللاش
اللي يعيش ايّام كنّا وكنّا

جدانكم راحوا وحنا نبي كاش
عيبٍ على ولد الحمايل يكٍنّا

الطيب ماجابه كثير التغشاش
اللي عن دروب المراجل تونّا

لاكبرت القاله تلاقيه منحاش
وان هوّدت جر الهجيني وغنّا

واطلق السانه بالسواليف يعتاش
بين المجالس يرتكي ويتثنّى

مدري مرض والا يدوّر له اعراش
والا الزمن ماهو زمان المكنّا

كانه ولد عمده وكانه ولد باش
لاينزل بواد الرخم ويتدنّا

عبدالرحمن الناهي